Sa Pagitan Ka Natagpuan

By: Maimai Cantillano

Parati kong naririnig ang dalawa sa mga uri ng pag-ibig
Tamang pag-ibig ngunit maling panahon
Tamang panahon, ngunit maling pag-ibig
Hindi ko alam kung alin tayo sa dalawa
Kung tama pa ba o mali na

Nasaan ka na ba?
Hindi na ba talaga tayo magkakatagpo?
Dahil kung ito’y tagu-taguan,
Hindi ko alam kung sino sa atin ang taya
O kung sino sa atin ang nawawala
Napapakaliwanag ng buwan
Ngunit hanggang ngayon hindi pa rin tayo magkakitaan
Hindi ko alam kung sino ba sa atin ang nagtatago
Dahil matagal nang tapos ang isa hanggang sampu
Matagal na rin akong umalis saking pinagtataguan
At ngayon, patuloy na naglalakad sa kawalan na dati ay kalawakan
Kalawakan na sabay nating pinagmamasdan
Sa ilalim ng nagniningning na mga bituin
Kasama ang mga alitaptap na sumusulyap sa pag-ibig natin
Ngunit sino bang nagtatago? At sino ang naghahanap
Lumalalim na ang gabi pero wala ka pa rin sa aking tabi
Kaya’t sabi ko
Hindi na ako pwedeng maglaro
Hahanapin kita kaya’t ako’y tumayo
Wala akong pakealam kung ako’y madapa
O kung ako ma’y mataya
Isinantabi ko ang takot ko sa dilim
O sa kung anong nasa likod ng dilim
Dahil kailangan kitang bawiin sa tadhana
Hindi ko alam kung paano pero babawiin kita
Hahanapin kita
Kahit nasaan ka pa
Hahanapin kita
Hahanapin kita

At nakita na nga kita
Natagpuan kita sa pagitan ng gabi at umaga
Hindi alam kung magpapatuloy pa
Kung nanakawin pa ang mga tala para sa akin
Dahil alam mong kahinaan ko ang mga bituin
Natagpuan kita sa pagitan ng laban at paalam
Nakikipagdigma sa tadhana
Dahil ang sabi mo, iyon ang tama
Natagpuan kita sa pagitan ng ngayon at bukas
Masaya ngunit lumuluha
Hindi ko alam kung anong paniniwalaan ko
Kung ang ngiti mo ba o ang luha mo
Natagpuan kita sa pagitan ng mahal kita at ng minahal kita
Ngunit nagdurugo ka na

Patawad
Dahil kung minsan, mas nauuna pa ang dila kong pumutak
Kaysa mag-isip ang kulubot kong utak
Patawad dahil kung minsan
Nauuna pa ang pagmulat ng aking mga mata
Kaysa sa pagtibok ng puso kong hinahapo na
Patawad dahil kung minsan
Binabalewala ko ang mga tenga mong hindi napapagod sa
Pakikinig sa bawat pantig na niluluwa ng aking bibig
Kahit minsan wala naman talagang kwenta
Ang mga binibitawan kong salita
Patawad
Kung isa ako sa dahilan ng pagsikip ng ‘yong mundo
Kung ang dating payak ay naging komplikado
Patawad
Kung isa ako sa nagpunla ng takot sa loob mo

Na unti-unting lumaki at ngayon ay iyo nang inaani
Patawad
Kung mas pinili kong magtago
Para lang hanapin mo
Kahit na ang dapat mong hanapin ay ang sarili mo
Naging makasarili ako
Kaya’t heto, nagkasalisi tayo
Sabay tayong naghanap
At sabay rin tayong nagtago
Nakakapagod pala ang laro
Akala ko kasing simple lang ng pagbilang mula isa hanggang sampu
Pero hindi pala
Kaya’t patawad
Dahil hindi ko na kayang makita kang nagdurugo sa pagitan
Ng gabi at umaga
Ng laban at paalam
Ng ngayon at bukas
At ng mahal kita at minahal kita
Hindi ko na kayang makitang nasasaktan ka
Kaya’t mahal,
Malaya ka na

Kapag nakita mo na s’ya

By: Maimai Cantillano

Kapag nakita mo na sya, wag ka magtaka kung di ka kaagad nya makikala
Kung ano ang naramdaman mong kilig, baka iyon naman ang naramdaman n’yang inis
Kung paano mo siya titigan, baka ganun ka lang din nya lagpasan, balewalain at hindi pansinin

Kung gaano kabilis ang tibok ng puso mo nung nakita mo siya, baka ganun din kabilis ang pag-alis niya
At sigurado ako itataboy ka nya palayo
Kapag nangyari ‘yun, wag mo sana isipimg wala ng pag-asa
Siguro sanay na lang din talaga syang mag-isa
At sa hinaba-haba ng panahon ng pag-iisa niya, iniisip nya na hindi na nya kelangan ng iba
Ng isang katulad mo na maaring magdala sa kanya sa ibang mundo

Marahil ganyan ang turo sa kanya ng buhay at pag-ibig
Ang damhin ang lahat ng sakit, ang tanggapin ang anumang ibato ng buhay
Ang palayain ang lahat ng emosyon hanggang sa wala na syang muling maramdaman pa
Kaya’t kapag nakita mo na siya, hindi na siya naniniwala sa paghiling sa mga bulalakaw
Hindi na siya namamangha sa mahika ng buwan at mga bituin
O sa kung ano mang pwersa ng uniberso na maaring magtulak sa kanya patungo sa ‘yo
Hindi na siya naniniwala sa anu mang salita na nilikha ng pag-ibig
Hindi na siya naniniwala sa pag-ibig
Kapag nakita mo na siya, baka ang tanging papel na lang ng puso nya ay ang panatilihin syang buhay
Baka tumitibok na lamang ito para padaluyin ang dugo sa katawan nya
Dahil kapag nakita mo na sya, hindi na nya alam ang pakiramdam ng magmahal at ng mahalin..ng arugain at yakapin
Ngunit wag kang mag-alala, dahil mukha lang naman ng pag-ibig ang nakalimutan nya
At ipaaalala mo ito sa kanya

Wag kang magsasawang ipaalala sa kanya kung gaano sya kaganda
Wag kang titigil sabihin sa kanyang mahal mo sya kahit na sa bawat pagbanggit mo sa salitang mahal kita ay pait at sakit ang naaalala nya
Wag kang titigil na sabihin ito sa kanya hanggang sa maalala niya na sa likod ng bawat pait ay may tamis
Sa likod ng bawat sakit ay may ligayang dulot ang mga salitang mahal kita
At kung saktan ka man ng mga salita niya, gantihan mo ito ng yakap
Kung magpumiglas siya, hatakin mo siya pabalik at yakapin ulit
Kung paulit-ulit siyang umalis, paulit ulit mo rin syang habulin
Kung paulit-ulit siyang bumitaw, paulit-ulit mo rin syang hawakan

Pakiusap, wag na wag mo siyang bibitawan
Wag na wagmo siyang pakakawalan
Ipaalala mo sa kanya na minsan rin siyang naniwala sa paghiling sa mga bulalakaw
Na minsan na rin syang namangha sa mahika ng buwan at mga bituin
Na minsan din siyang naniwala sa mga salitang nilikha ng pag-ibig
Na minsan din siyang naniwala sa pag-ibig
Ipakita mo sa kanya amg bagong mukha ng pag-ibig
Pakiusap, wag na wag mo siyang susukuan
Hanggang sa maisip niya, na ang pag-iisa ay mayroon ding hangganan